தொடர் 08… 

எழுதுபவர் – 

கவித்திலகம்,

மௌலவீ HMM. இப்றாஹீம் நத்வீ

நபிகளின் திருக்காட்சி 

“அல்ஜாமிஅதுல் இஸ்லாமிய்யா ” மதீனஹ் வளாகத்தின் இமாறதுஸ்ஸுபைஃ மாணவர் விடுதியில் துயின்ற பேரறிஞர் மிஸ்பாஹீ நாயகம் திடீரென்று எழுந்து மச்சான் ஹஸ்புல்லாஹ் எழும்பு என்று நித்திரையிலிருந்த தமது நண்பனை அழைத்தார்கள். நண்பனின் அழைப்பைக் கேட்டு தீடீரென விழித்த நண்பன் ஹஸ்புல்லாஹ் என்ன மச்சான் றஊப்… என்று கேட்டவராகவே அருகில் வந்தார். அவரை அருகில் அமர்த்திய அறிஞர் அவருக்கு தான் கண்ட அருள் நிறைந்த அந்த அற்புதக் கனவை விளக்கினார்கள்.

எங்குமே பாலைவனக் காட்சி 

மலைகள் போன்ற மண்குவியல்கள் 

சூடுமில்லா குளிருமில்லா காற்று உடலைத் தழுவியது . 

மண்மலைகளிடையே நான் நின்று கொண்டிருந்தேன். 

எங்கோயிருந்து மழலைகளின் பைத்தோசையொன்று 

காற்றோடு கலந்து காதில் கேட்டுக் கொண்டிருந்தது. 

அது எனக்குப் பழக்கப்பட்ட இசையாகவும் இருந்தது. மீண்டும் அந்த பைத்தோசையைக் காற்று காதில் போட்டது. ஆம், அது நபிகள் கோமான் முஹம்மத் (ஸல்) அவர்கள் மதீனாவுக்கு ஹிஜ்றத் வந்த போது மதீனத்து மக்கள் கூடி நின்று நபீ பெருமானை வரவேற்றுப் பாடிய அதே பாடல் தான். 

“தலஅல் பத்று அலைனா 

மின் தனிய்யாத்தில் விதாஇ 

வஜபஷ்ஷுக்று அலைனா 

மாதஆ லில்லாஹி தாஇ” 

இப்பாடலைக் கேட்டதும் எம்மனதில் நபி (ஸல்) அவர்களின் ஹிஜ்றத் நிகழ்ச்சி நினைவில் மலர்ந்தது. அதனால் நபி கோமான் அவர்கள் இங்கிருக்க வேண்டும் என்ற எண்ணம் இதயத்தில் உதயம் பெற்றது . மலைபோல் உயர்ந்திருந்த மணல் மலைகளின் மேலேறியிறங்கி பாடல் வந்த திசையைத் தேடினேன். 

பாடலிசை தற்போது என் செவிகளுக்கு மிகத் தெளிவாகவும் அண்மித்ததாகவும் கேட்டது. ஆனால் பாடுவோரைத்தான் காணவில்லை. 

இங்கு நபிகள் நாயகம் இருக்கிறார்கள் என்ற எண்ணம் உறுதிபெற என் ஆவல் அதிகரித்தது. மீண்டும் மலைகளில் ஏறி இறங்கி ஓடினேன். அப்பொழுது பாடலிசை மிக அண்மித்தது. அத்திசையால் விரைந்தோடினேன். 

அங்கே நான் கண்ட காட்சி 

இறைவனே அதற்குச் சாட்சி 

வார்த்தைகளால் வர்ணிக்க முடியவில்லை. 

அங்கே அண்ணல் கோமான் (ஸல்) தங்கள் பொற்கன்னத்தில் மரகதக் கரத்தை வைத்து சாய்ந்து படுத்தவண்ணமிருந்தார்கள். 

செக்கச்சிவந்த சிறுவர் சிறுமியறும் செம்பிறை வதனம் கொண்ட மற்றோறும் செம்மல் நபியவர்களின் முன்னே நின்று பாடலிசைத்துக் கொண்டிருந்தார்கள். 

அண்ணல் நபி (ஸல்) அவர்களை நானும் நோக்கினேன். நபி அவர்களும் என்னை நோக்கினார்கள். அவ்வாறே தான் கனவு கலைந்தது. கனவை நண்பரிடம் சொன்ன அறிஞர் மிஸ்பாஹி அவர்கள் காணக்கிடைக்காத முழுமதியை , சம்பூரணோதயத்தைக் கண்ட களிப்பில் ஆனந்தக் கண்ணீருடன் காணப்பட்டார்கள். தனக்குக்கிடைத்த நற்பாக்கியத்தை நினைத்து அல்லாஹ்வைப் புகழ்ந்தார்கள் இருவரிடையே சில வினாடிகள் மௌனம் நிலவியது. மௌனத்தைக் கலைத்த நண்பர் ஹஸ்புல்லாஹ் ( மச்சான் றஊப், நீ சத்தியமாக றஸுலுல்லாஹ்வையே கண்டாய் நீ நபிகட்கரசரையே கண்டாய். நீ நபிகள் கோமானையே கண்டாய் நீ பாக்கியவான். நீபாக்கியவான் என்று வாழ்த்துக் கூறிய நண்பர் அறிஞர் மிஸ்பாஹி அவர்களை முஸாபஹஹ், முஆனகஹ் செய்து அருள் பெற்றார். 

مَن رآني فى المنام فقد رآني 

மன்றஆனீ பில்மனாமி பகத் றஆனீ 

என்னைக் கனவில் கண்டவர் என்னையே கண்டார் என்றும் 

فا ن الشيطان لايتمثل فى صورتي 

பஇன்னஷ் ஷெய்த்தான லாயதமத்தலு பீஸுறதீ 

நிச்சயமாக ஷெய்தான் எனதுருவத்தில் தோன்றமாட்டான் 

என்றும் நபிகள் நவின்ற பொன் மொழி அறிஞரின் நினைவுக்கு வந்தது. 

நபிகளைக் காண்பது சாதாரண வணக்கமல்ல 

நபி (ஸல்) அவர்களை கனவில் காண்பது சாதாரண விடயமல்ல எல்லோரும் காணவுமாட்டார்கள் அதற்கு நிகரான வணக்கம் எதுவும் இல்லை அதே போன்று ஒரு முஃமின் நபிகளை நேரில் காண்பதும் அவர்களை கண்டவரைக் காண்பதுமாகும். 

அவர்களின் திருமுகக் காட்சிக்கு நிகரான காட்சி எதுவுமில்லை சொர்க்கமும் அதிலுள்ளவையும் உலகவும் அதிலுள்ளவையும் அதற்கு நிகராகாது. 

அதேபோல் நாம் ஆயிரம் வருடம் வாழ்ந்து கோடிக்கணக்கான அமல்களைச் செய்தாலும் அவை அக்காட்சிக்கு நிகராகாது. 

இதை சுருக்கமாக விளங்குவதாயின் பின்வரும் உதாரணத்தின் மூலம் விளங்க முடியும். 

நபி ஸல் அவர்களின் காலத்தில் காபிராக இருந்து நபிகளுக்கெதிராகப் போர் செய்த ஒருவர் நபிகளிடம் வந்து இஸ்லாத்தை ஏற்றார். இஸ்லாத்தை ஏற்ற அவர் பத்து நிமிடத்தில் மௌத்தாகி விட்டார். இவர் சஹாபீ என்ற பெயரைப் பெறுகிறார். 

இவர் செய்த அமல் இரண்டு 

ஒன்று இஸ்லாத்தை ஏற்று திருக்கலிமாவை மொழிந்து ஈமான் கொண்டது. 

இரண்டு இவர் நபி ஸல் அவர்களின் திருமுகத்தைப் பார்த்தது. 

இவ்விரண்டு அமல்களைத் தவிர இவர் எந்த அமலும் செய்ய வில்லை. 

மற்றவர் நபிகளின் காலத்தின் பின் ஒரு முஸ்லிமுக்குப் பிறந்து முஸ்லிமாக வாழ்ந்து இடைவிடாத வணக்கத்தாலும் இறையருளாலும் விலாயத் என்ற பட்டத்தை பெற்றவர் நூறு வருடங்கள் வாழ்ந்து மௌத்தை அடைந்தார். 

ஒருவர் காபிறாக வாழ்ந்து நபிகளிடம் வந்து இஸ்லாத்தை ஏற்று நபிகளைக் கண்டு சஹாபியாகி இஸ்லாத்தில் பத்து நிமிடம் வாழ்ந்து மரணித்தவர். 

மற்றவர் நபிகளின் காலத்தின் பின் ஒரு முஸ்லிமுக்கு மகனாகப் பிறந்து இறை விலாயத்தைப் பெற்று நூறு வருடம் வாழ்ந்து மரணித்தவர். 

ஷரீஅதின் சட்டத்தில் இவ்விருவரில் யார் உயர்ந்தவர் என்று கேட்கப்பட்டால் நூறு வருடம் வாழ்ந்து விலாயத்தைப் பெற்று மரணித்தவர்தான் என்று சட்டம் சொல்லாது. பத்து நிமிடம் முஸ்லிமாகவும் சஹாபியாகவும் வாழ்ந்து மரணித்தவர் தான் என்று சட்டம் சொல்லும். 

அப்படியானால் நூறு வயது வாழ்ந்தவனை விட பத்து நிமிடம் வாழ்ந்த அந்த சஹாபி செய்த அமல் என்ன? எதனால் அவர் பதவியில் உயர்ந்தார்? 

அந்த சஹாபி இவரைப் போல் நூறு வருடங்கள் வாழவுமில்லை ஆயிரக்கணக்கான நல்லமல்களைச் செய்யவுமில்லை. 

அப்படியாயின் அவர் செய்த விசேட அமல் நபி ஸல் அவர்களை தன் தலைக் கண்களால் நேரடியாகக் கண்டதேயாகும். 

அந்த திருமுகத்தைப் பார்த்ததால் தான் அந்த விலாயத்தைப் பெற்ற மகானை விட அந்த சஹாபீ சரீஅத்தின் தரஜாவில் உயர்ந்தவரானார். 

இதே போல் தான் நபிகள் கோமான் முஹம்மத் ஸல் அவர்களைக் கனவில் கண்டவருக்கும் உயர்வான அந்தஸ்துண்டு அவர்களைக் கனவில் கண்டவருக்கும் காணாதவருக்கும் இடையில் நிறைய வேறு பாடுகளும் உள்ளன. 

அவர்களைக் கனவில் கண்டவர் அவர்களையே காண்கிறார் என்றும் ஷெய்தான் அவர்களின் திருவுருவில் தோற்றமளிக்கான் என்றும் அவர்களே நமக்குச் சொல்லியுள்ளது அவர்களின் திருக்காட்சியின் மாண்பைக் காட்டுவதுடன் சிந்தனைக்கும் வித்திடுகிறது. 

ஷெய்தான் பல உருவங்களை எடுத்து மக்களை வழி கேட்டில் சேர்ப்பான் ஒரு தோற்றத்தில் தோன்றி நான் இறைவன் என்றும் சொல்வான். ஆனால் நபிகளின் உருவில் அவன் தோன்ற மாட்டான். அவனால் தோன்றவும் முடியாது. 

எனவே ஒருவர் கனவில் நபி ஸல் அவர்களைக் கனவு காண்கிறார். கனவில் தான் காண்பது நபிகளைத்தான் என்பது அவருக்கு ஏதோ ஒரு வகையில் தெரியவருகிறது. கண்ணை விழித்தார். அவர் கண்டது நபிகள் ஸல் அவர்களையே ஆகும். இதில் சந்தேகமில்லை. 

நபி ஸல் அவர்களின் இளமைத் தோற்றம் முதுமைத் தோற்றம் , சிறு வயதுத் தோற்றம் இவற்றில் விளக்கங்கள் வித்தியாசப்படினும் நபிகளைக் கண்டவர் அவர்களையே காண்கிறார். 

எனவே நமது பேரறிஞர் மிஸ்பாஹி நாயகம் அவர்கள் நபிகள் ஸல் அவர்களை ஹிஜ்றத் கால தோற்றத்தில் கண்டு சுகம் பெற்றார்கள். அதனாற்றான் அவர்களும் எதிரிகளின் கொலைப்பயமுறுத்தலினால் தான் பிறந்த ஊரான காத்தான்குடியை விட்டும் ஹிஜ்றத் செய்ய வேண்டி ஏற்பட்டுள்ளது என்று கருதுகின்றேன். 

இது நபிமாருக்கும் பெரியாருக்கும் ஏற்படும் சோதனைகளேயாகும். அதிக மகான்கள் எதிரிகளின் தொல்லையால் தாம் பிறந்த ஊரை விட்டே ஹிஜ்றத் செய்த வரலாறே இஸ்லாமிய வரலாற்றில் நிறைந்து காணப்படுகின்றன. 

(பூக்கும்)

***==***==***==***==***==***

கவித்திலகம்,

மௌலவீ HMM. இப்றாஹீம் நத்வீ

இறையறருளால் அறிஞரின் “ஹஜ்” கடமை இனிது நிறைவேறியது. தான் நினைத்திடாத ஹஜ் கடமையை இறைவன் தந்ததையிட்டு அல்லாஹ்வை மனமாரப் புகழ்ந்தார்கள். அங்குள்ள புனித தலங்களையெல்லாம் அறிஞருக்குக் கண்ணாரக் காணும் பாக்கியத்தை அல்லாஹ் அருளினான். 

அப்போது அவ்வருடம் ஹஜ் கடமைக்காக வந்திருந்த தமதூர் சகோதரர்களான அல்ஹாஜ் மீராமுகைதீன் (பதுளை முஹம்மதியாஸ்) அல்ஹாஜ் ஷாஹுல் ஹமீது (மட்டக்களப்பு மர்ழியாஸ்) ஆகியோரையும் சந்தித்து அவர்களுடன் ஒருவாரம் மக்காவில் தங்கினார்கள். அதிகாலை அவர்களையும் அவர்களுடன் வந்தவர்களையும் அழைத்துச் சென்று புனித தலங்களை ஸியாரத் செய்து அத்தலங்களின் வரலாறுகளை விளக்கினார்கள். 

அறிஞர் மிஸ்பாஹீ அவர்களை மக்காவில் வைத்து சந்திக்கும் பாக்கியம் அவர்களுக்குக் கிடைத்தது பெறும் மகிழ்வைக் கொடுத்தது. 

கஃபாவுக்குப் பிரியா விடை 

ஆம். கஃபாவின் சிறப்புக்கள் எத்தனை எத்தனை. பிரியா விடைக்காக கஃபாவின் முன் நின்ற அறிஞரின் சிந்தனையில் அதன் சிறப்புக்கள் பூத்தன. அது கோடிக்கணக்கான நெஞ்சங்களைக் காந்தம் போல் ஈர்த்துக் கொண்ட வல்ல அல்லாஹ்வின் முதல் இல்லம். 

Ø உலகில் தோன்றிய ஒரு இலட்சத்து இருபத்து நான்காயிரம் நபிமார்களும் தவாப் செய்த புனித தலம். 

Ø சொர்க்கத்திலிருந்து “ஹஜறுல் அப்யழ்” வெள்ளைக் கல்லாக இறக்கப்பட்டு மனிதர்களின் முத்தங்களால் அவர்களது பாவங்களை உறிஞ்சியெடுத்து கறுப்பாகிக் காட்சி தரும் புனித “ஹஜறுல் அஸ்வத்” கறுப்புக்கல். 

Ø அருகே மகாமே இப்றாஹீம், இப்றாஹீம் (அலை) அவர்களின் திருப்பாதம் பதிந்த இடம். 

Ø கஃபாவின் அருகில் நபீ இஸ்மாயீல் (அலை) அவர்களின் மகாமே இஸ்மாயீல்! 

Ø அதில் ஒரு றக்அத் தொழுதால் ஒரு இலட்சம் நன்மை தரும் புனித இல்லம்! 

Ø இறுதி காலத்தில் தோன்றும் தஜ்ஜால் நுழைய முடியாத இறை அரண்! 

Ø எவ்வேளையிலும் மனிதர்களாலும் மலக்குகளாலும் சூழப்படும் இறை ஆலயம்! 

Ø துஆக்கள் அங்கீகரிக்கப்படும் புனிதத் தலம்! 

Ø இஸ்லாமியர்களின் உயிராகக் கணிக்கப்படும் இல்லம். 

Ø அப்றஹா அரசன் யானைப் படையுடன் கஃபாவை இடிக்கவந்த போது அவனும் அவனது படைகளும் இடிக்கப்பட்டு உடைக்கப்பட்டு சாம்பலாகுவதற்குரிய காரணமான ஆலயம். 

Ø கோடீஸ்வரர்களும், மன்னர்களும் ஏழைகளும் வேறுபாடின்றி ஒரே உடையில் ஒன்று கூடும் உன்னத தலம். 

Ø நிகரில்லா ஸம்ஸம் நீர் ஊற்றெடுத்துக் கொண்டிருக்கும் உயர்பீடம். 

Ø பார்ப்பது வணக்கமாக்கப்பட்ட உயர் இல்லம். 

இவ்வாறு கஃபாவின் சிறப்புக்கள் அறிஞரின் சிந்தனையில் ஒன்றன் பின் ஒன்றாக பூத்துக் கொண்டேயிருந்தது. 

புனித தவாபை முடித்த மகானவர்களுக்கு கஃபாவை விட்டும் பிரியப்போகின்றோம் என்பதை நினைத்து அழுகையும் சலிப்பும் ஏற்பட்டது. 

தன்னை மீரிய கண்கள் நீரைச் சொரிந்தன. கைகள் மேலே உயர்ந்தன. யாஅல்லாஹ், உனது புனித இல்லத்தை பார்க்கும் பாக்கியத்தை இந்தப் பாவிக்கம் தந்து விட்டாய். ஹஜ்ஜை நிறைவேற்ற வகை செய்தாய் . 

நான் உனது வீட்டை விட்டும் பிரியப் போகிறேன். உனது ஹபீபாகிய முஹம்மதுன் (ஸல்) அவர்களை தரிசிக்கப் போகின்றேன். எனக்கு அவர்களின் தரிசனத்தை தருவாயாக! நான் மிகத்தூரத்திலிருந்து வந்துள்ளேன். என்னை உனது சிற்றடிமையாக ஏற்றுக் கொள்வாயாக. எனது பிராத்தனைகளை ஏற்றுக் கொள்வாயாக என்று பிரியாமல் பிரிந்தார் நமதரிஞர். 

அறிஞர் மிஸ்பாஹியின் மதீனாப் பயணம் 

தன்னந்தனியனாய் வந்து இறை கடமைகளை இறைநேசத்துடன் முடித்த அறிஞர் மக்காவிலிருந்து மதீனா நகருக்குப் பிரயாணத்தை மேற்கொண்டு மதீனாவை வந்தடைந்தார்கள். அங்கே அவர்களை வரவேற்பதற்கு அவர்களுடன் இலங்கை,இந்தியாவில் ஒரேபாடத்தில் ஓதியவரும் இலங்கையில் ஒன்றாக ஓதிக் கொண்டிருந்தவருமான அல்ஹாஜ் மௌலவீ ஹஸ்புல்லாஹ் அவர்கள் வந்திருந்தார் அவர் அப்போது மதீனாவின் “அல்ஜாமிஅதுல் இஸ்லாமிய்யாஹ்” இஸ்லாமிய பல்கலைக்கழகத்தில் ஏற்கனவே சேர்ந்து ஓதிக்கொண்டிருந்தார். அதனால் அறிஞருக்கு தனிமை என்ற கவலை மறந்தது. காரணம் மௌலவீ ஹஸ்புல்லாஹ் அவர்கள் அறிஞரின் அன்பு நண்பர். 

கற்கும் காலத்திலும் கற்பிக்கும் காலத்திலும் பல வருடங்கள் ஒன்றாகப் பழகியவர். திஹாரியைச் சேர்ந்தவர். சுறுசுறுப்பானவர். எதையும் முன் சென்று செய்யும் தைரியமும் துணிவும் கொண்டவர். அவருடன் கற்கும் காலத்திலும் கற்பிக்கும் காலத்திலும் நடந்த சுவையான செய்திகளை மிஸ்பாஹீ நாயகம் எமக்குச் சொல்லியிருக்கிறார்கள். இலங்கையில் தற்போதைய “சரீஆ” கவ்ன்ஸிலின் தலைவர் சுவையான நண்பர். இருவரும் மச்சான் முறை சொல்லிப்பேசிக் கொள்ளும் நெருக்கம் கொண்டவர்கள். இதனால் அறிஞருக்கு கவலை மறந்து மகிழ்வு தோன்றியது. 

மதீனா வந்தடைந்த அறிஞர் தனது நண்பருடன் பல்கலைக்கழகம் சென்று தன்னை ஒரு மாணவராக பதிவு செய்து கொண்டார்கள். 

காத்தான் குடியிலிருந்து மதீனா வளாகம் சென்ற முதல் மாணவர் அறிஞர் தான். 

அறிஞருக்கு முதல் யாரும் காத்தான்குடியிலிருந்து அங்கு கற்கைக்காக சென்றதில்லை. 

நண்பர் ஹஸ்புல்லாஹ்வுக்கு தங்கும் வசதி மதீனாவிலுள்ள “இமாறதுஸ் ஸூபைஃ” மாணவர் விடுதியே கிடைத்தது. 

அங்கிருந்து பார்த்தால் நேராக மஸ்ஜிதுன் நபவியும் குறிப்பாக அதில் கொலுவீற்றிருந்து செங்கோள் நடாத்தும் றஸூலுல்லாஹ் அவர்களின் திரு றவ்ழஹ்வுக்குரிய பச்சை குப்பாவும் தெரியும். அங்கேதான் நண்பர் ஹஸ்புல்லாஹ்வும் தங்கியிருந்தார். 

அன்று மதீனா வந்து நபீ (ஸல்) அவர்களின் திரு றவ்ழாஹ்வைத் தரிசித்த பின் பல்கலைக்கழகம் சென்று பெயரை பதிவு செய்தபின் மீண்டும் நபிகள் நாதர் அவர்களின் புனித றவ்ழாஹ்வுக்கு வந்து அங்கு நீண்டநேரம் முனாஜாத்தில் ஈடுபட்டிருந்தார்கள். அன்று முதல்நாள் நமதறிஞர் நண்பர் ஹஸ்புல்லாஹ்வின் அறையிலேயே தங்கினார்கள். மிக நீண்ட நேரம் இருவரும் பிரிந்திருந்த காலத்தில் ஏற்பட்ட நன்மை தீமைகளை ஒருவருக் கொருவர் பகிர்ந்து கொண்டனர். தாமிருவரும் இலங்கையிலும், இந்தியாவிலும் ஒருமித்திருந்தது போல் இங்கும் ஒன்று சேர்ந்து வாழ்வதற்கு இறைவன் தந்த பாக்கியத்தை நினைத்து அல்லாஹ்வை புகழ்ந்தார்கள். 

பயணக் களைப்பால் துயில் ஆரத்தழுவியது. இருவரும் உறங்க முடிவு செய்தனர். நண்பர் ஹஸ்புல்லாஹ் நமதரிஞருக்கு தனது கட்டிலைக் கொடுத்து தான் கீழே துயின்றார். அதிகாலை மூன்றரை மணியிருக்கும் அறிஞர் நண்பர் ஹஸ்புல்லாஹ்வை மிக அவசரமாக எழுப்பினார். 

(பூக்கும்)

***==***==***==***==***==***