————————————————————

اَلنَّوْمُ مَعَ الْوُضُوْءِ دَيْدَنُ الْأَنْبِيَاءِ وَالْأَوْلِيَاءِ وَالصَّالِحِيْنَ،
“வுழூ” செய்து கொண்டு உறங்குதல் நபீமார், வலீமார், மறறும் நல்லடியார்களின் வழக்கமாகும்.

ஒருவன் “வுழூ” செய்து கொண்டு இரவு 10 மணிக்கு உறங்கி அதிகாலை 04 மணிக்கு விழித்தானாயின் அவன் உறங்கிய 06 மணி நேரங்களும் அவன் “வுழூ” உடன் உறங்கியவனாகவே கணிக்கப்படுவான். 06 மணி நேரங்கள் அவன் வணக்கத்தில் இருந்ததாகவே கணிக்கப்படும்.

ஒருவன் “வுழூ” செய்து அந்த “வுழூ” முறியாமல் இருக்கும் போது மீண்டும் “வுழூ” செய்வதால் முந்தின “வுழூ” செயலற்றதாய்விடும். இவ்வாறு செய்தல் “தஜ்தீதுல் வுழூஇ” “வுழூ”வை புதுப்பித்தல் எனப்படும். تجديد الوضوء سنة “வுழூ”வை புதுப்பித்தல் ஸுன்னத் என்று “ஷரீஆ” சட்டத்தில் கூறப்பட்டுள்ளதால் ஏற்கனவே எடுத்த “வுழூ” முறியாமல் இருந்தாற் கூட மீண்டும் “வுழூ” செய்தல் “ஸுன்னத்” ஆனதேயாகும்.

உறங்குவதன் மூலம் “வுழூ” முறியுமாயின் உறங்குவதற்காக “வுழூ” செய்தல் வீணான செயலாகிவிடும். எனவே, “வுழூ” செய்து கொண்டு உறங்குபவன் எப்போது கண் விழிக்கின்றானோ அப்போதுதான் அவனின் “வுழூ” முறியும். உறக்கத்தில் இருக்கும் வரை “வுழூ” முறிந்துவிடாது.

“வுழூ” செய்து கொண்டு உறங்குபவன் கண் விழிப்பதன் மூலம் அவனின் “வுழூ” முறிந்துவிடும் என்று சொல்வதை விட அவ்வாறு உறங்குபவன் தனது உறக்கத்திலிருந்து விடுபட்டால் “வுழூ” முறியும் என்று சொல்வதே மிகப் பொருத்தமானதாகும். ஏனெனில் “வுழூ” உடன் உறங்கும் ஒருவன் உறக்கத்திலிருந்து விடுபடாமலேயே கண் திறக்க சாத்தியமுண்டு. உறக்கத்தலிருந்து விழித்தல் என்பதும், உறக்கத்திலிருந்து விடுபடுதல் என்பதும் ஒன்றுதானா என்று விலங்கியல் மேதைகளிடம் கேட்டுத் தெரிந்து கொள்ள வேண்டும். இவ்விடயத்தில் அவர்களின் கருத்துக்கே முன்னுரிமை கொடுக்கவும் வேண்டும். وَلِكُلِّ فَنٍّ رِجَالٌ

ஒவ்வொரு தொழுகைக்காகவும் “வுழூ” செய்து கொள்ளுதல் ஏற்கனவே செய்த “வுழூ”வுடன் தொழுவதை விடச் சிறந்ததாகும்.

அல்லாஹ்வின் நல்லடியார்களிற் பலர் ஒரே “வுழூ”வுடன் பல நாட்கள் இருந்ததற்கும், பல மாதங்கள் இருந்ததற்கும் ஆதாரங்கள் உள்ளன.

كان الشّيخ محي الدين ابن عربي رضي الله عنه مَكَثَ ثَلَاثَةَ أَشْهُرٍ بِوُضُوْءٍ وَاحِدٍ
ஷெய்குல் அக்பர் முஹ்யித்தீன் இப்னு அறபீ றழியல்லாஹு அன்ஹு அவர்கள் ஒரே “வுழூ”வுடன் மூன்று மாதங்கள் இருந்தார்கள் என்று அவர்களின் வாழ்க்கை வரலாறு கூறுகிறது.

“வுழூ”வுடன் உறங்கியவன் உறக்கத்திலிருந்து விடுபட்டால் “வுழூ” முறிந்துவிடுமென்றும், மல சலம் கழிப்பதால் “வுழூ” முறியுமென்றும், “மஹ்றம்” அல்லாத அன்னிய பெண்களின் உடல் திரையின்றிப் பட்டால் “வுழூ” முறியுமென்றும், ஒருவனின் உள்ளங்கைப் பகுதி ஆண்குறியில் படுவதால் “வுழூ” முறியுமென்றும் “ஷரீஆ”வின் சட்டம் கூறிக் கொண்டிருக்கும் நிலையில் இவற்றை முற்றாகத் தவிர்த்து மூன்று மாதம் இருப்பதானது வியப்பான ஒன்றேயாகும். அல்லாஹ் தனக்கு விருப்பமான பல மகான்களுக்கு அத்தகைய சிறப்பை வழங்கியுள்ளான். இச்சிறப்பு அவர்களின் ஆன்மீக பலத்திற்காக அல்லாஹ் அவர்களுக்கு வழங்கிய பரிசில்கள் என்றே சொல்ல வேண்டும்.

அரசியல் அதிகாரத்தால், அரண்மனைப் பலத்தால், மக்கள் பலத்தால் சாதிக்க முடியாதவற்றையெல்லாம் ஆன்மிக பலத்தால் சாதிக்க முடியும் என்பதற்கு நபீமார், வலீமார், நல்லடியார்களின் அற்புத வாழ்வு ஆதாரமாக உள்ளது.

திருச்சியில் சமாதி கொண்டு தீர்க்க முடியாத நோய்களையும், தொல்லைகளையும் தீர்த்து வருகின்ற தப்லே ஆலம் பாதுஷாவினதும், நாஹூர் ராஜா பாதுஷா அவர்களினதும், இன்னும் பல அவ்லியாஉகளினதும் அற்புத வாழ்வு ஆதாரமாக உள்ளது. தேடியறிந்தோர் தேனைப் பழித்த பேரின்பம் அடைவர்.

ஒரே “வுழூ” உடன் தொடர்ந்து பல நாட்கள் இருப்போர் இன்றுமுளர். முன்னூற்றொன்பதாண்டுகள் தொடராக உறங்கியும் எந்த ஒரு நோயாலும், உடல் மாற்றங்களாலும் பாதிக்கப்படாத, திருக்குர்ஆன் கூறுகின்ற “அஸ்ஹாபுல் கஹ்ப்” குகைவாசிகளின் வரலாறு ஆன்மீக பலத்தை உணர்த்தும் பெரும் ஆதாரமாகும்.

உலகம் முழுவதும் இஸ்லாம் பரவியதற்கும், ஆன்மிகம் ஒளிர்ந்ததற்கும் ஆன்மிக வாதிகளின் சாதனைகளும், போதனைகளும், அற்புதங்களுமே அடிப்படைக் காரணங்களாக இருந்தன.

இன்று ஆன்மிகத்தின் மணத்தைக் கூட நுகர முடியாத அளவு அது மறைக்கப்பட்டும், மறுக்கப்பட்டும் விட்டன. ஆன்மிகம் குழியிலடப்படுவதற்கு வஹ்ஹாபிஸம் மட்டும் காரணமல்ல. ஸுன்னத் வல் ஜமாஅத் உலமாஉகளின் மௌனமும், அவர்களின் அக்கறையற்ற போக்கும், தம்மை வளர்த்துக் கொள்ள ஆன்மிகப் போர்வையில் வாழும் தரீகாவின் ஷெய்குமார்களுமேயாவர். حُبُّ المالِ ، حبُّ الجاهِ، حُبُّ النِّسَاءِ போன்ற அசூசிகளில் இவர்கள் விழுந்து போனதே இதற்குக் காரணம் எனலாம்.

يُرِيدُونَ لِيُطْفِئُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ
அல்லாஹ்வின் ஒளியான ஞானத்தை – ஆன்மிகத்தை அவர்கள் தமது வாயால் ஊதியணைக்க நினைக்கிறார்கள். இது நடக்காது. அல்லாஹ் தனது ஒளியை ஒளிரச் செய்து கொண்டே இருப்பான். “காபிர்”கள் வெறுத்தாலும் சரியே!

அன்புக்குரிய ஆன்மிகவாதிகளே!

ஆன்மிகத்தைக் கட்டியெழுப்ப அணி திரளுங்கள். இவ்வுலக வாழ்வுதான் நிரந்தர வாழ்வு என்ற பேதமைச் சிறையிலிருந்தும், சிந்தனையிலிருந்தும் வெளியேறுங்கள்.

சாத்திர வேதம் சத கோடி கற்றாலும்
சமய நெறிகளி னாசாரம் பெற்றாலும்
பாத்திர மேந்திப் புறத்திலலைந்தாலும்
பாவனை யாலுட லுள்ளமுலைத்தாலும்
மாத்திரை யேனு மெமன் வருமப்போது
மற்றொன் றுதவா துதவா துதவாது
சூத்திரமாகிய தோணி கவுழு முன்
சுக்கானை நேர்படுத்திக் கணமே சொன்னேன்.

முற்றும்.
எனது கருத்துக்களை வாசிப்பவர்கள் எனக்காக, எனது ஆரோக்கியத்துக்காக ஒரு நொடி நேரம் துஆ செய்யுமாறு கேட்டுக் கொள்கிறேன்.