கண்மணி நாயகம் ஸல்லல்லாஹு அலைஹி வஸல்லம் அவர்களை விழிப்பில் காணுதல்.

 

هل يُصدَّق من ادَّعَى رؤيةَ النبي صلى الله عليه وسلّم فى اليقظة الآن، فالجوابُ نعم يُصَدَّقُ، وقد أخبَرَني الشّيخُ الصّالح عطيةُ الأبْنَاسِيُّ، والشّيخ الصالح قاسم المغربي المقيم فى تربة الإمام الشافعي رضي الله عنه والقاضي زكريا الشافعي رضي الله عنهم، أنّهم سمعوا الشّيخَ جلالَ الدين السيوطي رحمه الله يقول: رأيتُ رسولَ الله صلّى الله عليه وسلّم فى اليقظة بضعًا وسبعين مرّةً، وقُلْتُ له فى مرَّةٍ منها هل أنا من أهلِ الجنّة يا رسول الله! فقال نعم، فقلتُ مِن غيرِ عذابٍ يَسْبِقُ؟ فقال لك ذلك،

قال الشّيخ عطيةُ وسَئَلْتُ الشّيخَ جلالَ الدين مرّةً أن يجتمع بالسلطان الغوري فى ضرورة وَقَعَتْ لي، فقال لي يا عطية أنا أجتمع بالنبي صلى الله عليه وسلّم يقظةً وأخشى إن اجتمعت بالغوري أن يحتجب صلى الله عليه وسلّم عنِّيْ،

ثم قال: إنّ فلانا من الصحابة كانت الملائكة تُسَلِّمُ عليه، فَاكْتَوَى فى جَسَدِهِ لِضَرُوْرَةٍ فلَمْ يَرَ الملائكةَ بعد ذلك، عقوبةً له على اكتوائِه،

சுருக்கம் தமிழில்:

விடை: ஆம், நம்பலாம். உண்மைப்படுத்தலாம்.

அஷ் ஷெய்குஸ்ஸாலிஹ் அதிய்யா அவர்களும், அஷ் ஷெய்குஸ்ஸாலிஹ் காஸிம் அவர்களும், (இவர்கள் இமாம் ஷாபிஈ றஹிமஹுல்லாஹ் அவர்களின் இடத்தில் தங்கியிருப்பவர்கள்) அல்காழீ இமாம் ஸகரிய்யா அவர்களும் பின்வருமாறு கூறியுள்ளார்கள்.

 

நாங்கள் மூவரும் ஜலாலுத்தீன் அஸ்ஸுயூதீ றஹிமஹுல்லாஹ் அவர்கள் பின்வருமாறு சொல்லக் கேட்டோம்.

 

(நான் கண்மணி நாயகம் அலைஹிஸ்ஸலாது வஸ்ஸலாம் அவர்களை விழிப்பில் 70 தடவைகளுக்கு மேல் கண்டிருக்கிறேன். அவ்வாறான சமயங்களில் ஒரு சந்திப்பின் போது, அல்லாஹ்வின் றஸூலே! நான் சுவர்க்கவாதியா? என்று கேட்டேன். அதற்கவர்கள் ஆம் என்றார்கள். தண்டனை பெற்றபின் சுவர்க்கமா? அல்லது தண்டனையின்றியே சுவர்க்கமா? என்று கேட்டேன். அதற்கவர்கள் தண்டனையின்றியே சுவர்க்கம் என்றார்கள்)

 

இங்கு சிறியதோர் நுட்பம் உண்டு. அது யாதெனில் இமாம் ஸுயூதீ அவர்கள் தண்டனை பெற்றபின் சுவர்க்கமா? தண்டனையின்றிச் சுவர்க்கமா? என்று கேட்ட கேள்விக்கு கண்மணி நாயகம் சொன்ன பதில் لَكَ ذَلِكَ என்பதாகும். இதன் சரியான பொருள் “உங்களுக்கு அது உண்டு” என்பதே. இந்த பதில் இரண்டுக்கும் சாத்தியமானதேயாகும். (அதாவது தண்டனை பெற்ற பின் அல்லது தண்டனையின்றி)

 

இரண்டுக்கும் சாத்தியமானதாயினும் இந்த இடத்தைப் பொறுத்தும், கேள்வி கேட்ட இமாம் ஸுயூதீ அவர்களின் ஆன்மீகத் தரத்தைப் பொறுத்தும் வேதனையின்றியே சுவர்க்கம் கிடைக்கும் என்று பொருள் கொள்வதே பொருத்தமானதாகும்.

 

ஏனெனில் 70 தடவைகளுக்கும் அதிகமாக கண்மணி நாயகம் அவர்களை விழிப்பில் கண்ட இமாம் ஸுயூதீ றஹிமஹுல்லாஹ் அவர்கள் என்னதான் பாவம் செய்திருந்தாலும் ஒரு தரம் திரு நபீயின் ஒளி முகத்தைக் கண்டதோடு அவர்களின் பாவங்கள் மன்னிக்கப்பட்டிருக்குமென்பதில் நான் சந்தேகம் கொள்ள மாட்டேன். சந்தேகம் கொள்பவர்கள் இருப்பார்கள் என்பதிலும் நான் சந்தேகம் கொள்ளமாட்டேன். அத்தகையோர் இருப்பார்களாயின் அவர்கள் வஹ்ஹாபீகளாகவே இருப்பார்கள்.

 

இமாம் ஸுயூதீ அவர்களின் இந்த வரலாறு பெருமானாரை விழிப்பில் காண முடியுமென்று கூறுகிறது.

 

மேற்கண்ட மூவரில் ஒருவரான அஷ் ஷெய்கு அதிய்யா அவர்கள் பின்வருமாறு கூறுகிறார்கள்.

 

(அவர்களுக்கு ஏற்பட்ட முக்கிய தேவை காரணமாக அந்நாட்டு அரசன் ஙவ்ரீ என்பவரைச் சந்திக்க வேண்டிய தேவை இருந்ததாம். தனியே அவரிடம் சென்று தனது தேவையை முடித்துக் கொள்வதை விட இமாம் ஜலாலுத்தீன் ஸுயூதீ அவர்கள் அந்நாட்டில் பிரசித்தி பெற்ற ஓர் அறிஞனாயிருந்ததால் அவர்களையும் அழைத்துச் சென்றால் தனது காரியம் மிக இலகுவாக முடியுமென்று கருதிய இமாம் அதிய்யா அவர்கள் இமாம் ஜலாலுத்தீன் ஸுயூதீ அவர்களிடம் தனது விருப்பத்தைக் கூறினார்கள்.

 

அப்போது இமாம் ஸுயூதீ அவர்கள் அதிய்யா அவர்களிடம், நான் பெருமானார் அலைஹிஸ்ஸலாது வஸ்ஸலாம் அவர்களை அடிக்கடி விழிப்பில் சந்திப்பவனாக உள்ளேன்., நான் அரசர் ஙவ்ரியை சந்திப்பதால் பெருமானாரின் சந்திப்பு கிடைக்காமற் போய்விடவும் கூடுமென்று நான் அஞ்சுகிறேன் என்று காரணம் கூறி மறுத்துவிட்டார்கள்.

 

தான் மறுத்ததை நியாயப்படுத்தி அதற்கான சம்பவமொன்றையும் சொல்லிக் காட்டினார்கள்.

 

(நபீ அலைஹிஸ்ஸலாது வஸ்ஸலாம் அவர்களின் தோழர்களில் ஒருவருக்கு மலக்குகளிற் சிலர் ஸலாம் சொல்லி வந்துள்ளார்கள். ஒரு சமயம் குறித்த நபீ தோழர் ஏதோ தனக்கு ஏற்பட்ட காரணம் ஒன்றிற்காக தனது உடலில் சூடு வைத்துக் கொண்டார். அதன் பிறகு வழமையாக வந்து ஸலாம் சொல்லிக் கொடிருந்த மலக்குகள் அவரிடம் வருவதை நிறுத்திக் கொண்டார்கள். இது அந்த நபீ தோழர் செய்த வேலைக்குத் தண்டனையாக வழங்கப்பட்டதாகும்)

 

இவ்வாறு ஒரு வரலாறுண்டு என்பதை இமாம் ஸுயூதீ அவர்கள் சொல்லிக் காட்டி தனது தோழர் அதிய்யாவை திருப்திப் படுத்தினார்கள்.

 

அறபு மொழியில் كَوَى اِكْتَوَى என்றால் أَحْرَقَ جِلْدَهُ بِحَدِيْدَةٍ ஒருவன் இரும்பை நெருப்பில் காய்ச்சி – சூடாக்கி தனதுடலை சுட்டுக் கொண்டான் என்று பொருள்.

 

இமாம் ஸுயூதீ அவர்கள் சுட்டிக் காட்டிய நபீ தோழர் அவ்வாறு செய்துள்ளார் என்று மட்டும்தான் சொன்னார்களே தவிர ஏன் செய்தார்கள் என்று குறிப்பிடவில்லை. எதற்காக அந்த நபீ தோழர் செய்திருந்தாலும் அது விரும்பத்தகுந்த ஒரு செயலில்லை என்பது இந்த நிகழ்வின் மூலம் விளங்கப்படுகின்றது.

 

மார்க்கப்பற்று அதிகமான சில நல்லடியார்கள் தம்மால் ஒரு பாவம் நிகழ்ந்தால் தம்மைத் தாமே தண்டித்திருக்கின்றார்கள் என்பதற்கு ஆதாரங்கள் உள்ளன.

 

அவற்றில் ஒன்றை மட்டும் கூறுகிறேன். திருமணம் செய்து தனது மனைவி மக்களுடன் வாழ்ந்த ஒரு பெரியார் இரவில் உறங்குவதற்கென்று தனியான ஒரு இடத்தை அமைத்துக் கொண்டு உறங்கி வந்துள்ளார். அவர் அமைத்திருந்த அந்த இடத்திற்கு இரவில் எவரையும் அனுமதிக்கமாட்டார். ஒரு நாள் அவர் மரணித்து விட்டார். குளிப்பாட்டியவர்கள் அவரின் முதுகில் அதிகமான கசையடிக் காயங்கள் இருந்தது கண்டு அவரின் மனைவியிடம் அதுபற்றி வினவியுள்ளார்கள். அவர் அது பற்றி தனக்குத் தெரியாதென்று கூறியுள்ளார். பின்னர் அவர்தான் தனக்கு கசையால் அடித்து வந்துள்ளார் என்ற உண்மை தெரிய வந்துள்ளது.

 

இவர்போல் இன்னும் பல ஞானிகளும், துறவிகளும் வாழ்ந்து வந்ததற்கு ஆதாரங்கள் உள்ளன. ஸுப்ஹானல்லாஹ்! நாம் எங்கே? அவர்கள் எங்கே?!

 

இவ்வாறு மகான்களிற் பலர் தம்மால் வெளியான பாவங்களை நினைத்து தம்மைத் தாமே அடித்தும், சூடு வைத்தும், தமது “நப்ஸ்” என்ற மனவெழுச்சிக்கு வழிபடாமலிருக்க பட்டினி பசியில் கிடந்தும் வாழ்ந்தும் வந்ததற்கு ஆதாரமிருந்தாலும்கூட என்னைப் பொறுத்தவரை இவ்வாறு செய்யாமல் நாம் நமது “நப்ஸ்” என்ற மனவெழுச்சிக்கு வழிப்படாமல் வாழ்வதே சிறந்ததென்று நான் கருதுகிறேன்.

 

அல்லாஹ்வின் திருப்பொருத்தம், அவனின் அன்பு கிடைப்பதற்காக இறைஞானிகளும், ஸூபீகளும் அனுபவித்த கஷ்டங்களையும், துயரங்களையும் நினைத்துப் பார்க்கும் போது இவ்வுலக வாழ்வு கசந்து போகிறது. இதனால்தான் பல மகான்கள் காடுகளிலும், குகைகளிலும் வாழ்ந்துள்ளார்கள் போலும். இவர்களின் வாழ்வோடு நாம் இன்று வாழும் வாழ்வை ஒப்பிடுகையில் எமக்கு சுவர்க்கம் கிடைக்குமா? அல்லாஹ்வின் திருப் பொருத்தம் கிட்டுமா? என்பது சந்தேகமே!

 

எனவே, கண்மணி நாயகம் அலைஹிஸ்ஸலாது வஸ்ஸலாம் அவர்களை கனவில் மட்டுமாவது கண்டு பேரின்பம் பெற நாம் முயற்சிப்போம். அல்லாஹ்வினால் வழங்கப்படும் சோதனைகளையும், கஷ்ட நஷ்டங்களையும் மன நிறைவோடு ஏற்று வாழ்வோம்.

பல நாள் முயற்சி ஒரு நாள் பயன்தரும்.