தொடர் 03
அதி சங்கைக்கும், மரியாதைக்குமுரிய குத்புஸ்ஸமான் அப்துர் றஹ்மான் அம்பா நாயகம் அவர்களின் திருப் பேரர்.
அஸ்ஸலாமு அலைக்கும் வறஹ்மதுல்லாஹ்.
எல்லாமாயுள்ள ஏகன் அல்லாஹ்வின் நல்லருளாலும், கண்மணி நாயகம், கருணைக் கடல் முஹம்மத் அலைஹிஸ்ஸலாது வஸ்ஸலாம் அவர்களின் “றஹ்மத்”தாலும், காரணக்கடல் குத்புல் மஜீத் நாஹூரீ நாயகம் அவர்களின் “கறாமத்”தாலும் நானும், என்னுடன் வந்தவர்களிற் சிலரும் நாட்டுக்கு வந்து விட்டோம். அறபாத் ஹாஜியும், அவரின் மனைவியும் அஜ்மீர் ஷரீப் சென்றுள்ளார்கள். 21ம் திகதி நாட்டுக்கு வருவார்கள். தொடர்பு கொள்ள விரும்பினால் கீழ் தரப்பட்டுள்ள இலக்கத்தோடு தொடர்பு கொள்ள முடியும்.
கம்பம் நகருக்கு நான் ஏன் வரவில்லை என்பதற்கான காரணத்தை நான் கூறாமலேயே புரிந்து கொண்ட நீங்கள் இப்பாவியைப் பார்ப்பதற்காக பல கிலோமீற்றர் தூரம் வந்து பார்த்தது மட்டுமன்றி அப்பாவின் அருட் போர்வையால் என்னைப் போர்த்தி எனக்காக “துஆ” செய்தது உங்களின் பெருந்தன்மைக்கு ஒரு சான்றாகும். فَمَنْ يُشَابِهْ أَبَهُ فَمَا ظَلَمَ
உங்களைக் கொண்டு நானும், என்னைக் கொண்டு நீங்களும் “ஸஆதத்” பெற அல்லாஹ் அருள் செய்வானாக!
நீங்கள் உங்களின் அப்பா அம்பா நாயகம் அவர்களை தரிசிக்கச் செல்லும் போதெல்லாம் எனக்காக ஒரு நிமிடம் ஒதுக்கி அல்லாஹ் என்னைப் பொருந்திக் கொள்வதற்கு “துஆ” செய்ய வேண்டுமென்று கேட்டுக் கொள்கிறேன்.
காதிமுல் கவ்மி, மௌலவீ அல்ஹாஜ் A அப்துர் றஊப் மிஸ்பாஹீ பஹ்ஜீ
11.01.2023
0094 75 75 76 760
தொடர் 01
مَنْ لَمْ يَشْكُرِ النَّاسَ لَمْ يَشْكُرِ اللهَ
மனிதர்களுக்கு நன்றி செய்யாதவன் அல்லாஹ்வுக்கு நன்றி செய்யாதவனாவான்!
நான் அண்மையில் காரணக்கடல், காதிர் வலீ, ஷாஹுல் ஹமீத் பாதுஷா றஹிமஹுல்லாஹ் அவர்களின் “கப்ர்” ஷரீபுக்கு சந்தனம் பூசும் அருள் நிறைந்த நிகழ்வில் கலந்து அருள் பெறுவதற்காக எனது “முரீது” சிஷ்யர்கள் சிலருடன் தமிழ் நாடு நாஹூர் ஷரீபுக்குச் சென்றேன்.
மக்கள் வெள்ளத்தால் நாஹூர் நகர் கடல் போல் தோற்றியது. ஹோட்டல்களும், லாட்ஜ்களும், வீடுகளும் சனங்களால் நிரம்பி வழிந்தன. “யா காதிர் முறாத் ஹாஸில்” என்ற முழக்கம் நெஞ்சங்களைப் பிழந்தன.
சனக் கூட்டங்களுக்கிடையில் நான் நுழைந்து பாதுஷா நாயகம் அவர்களின் அருளறைக்குள் புகுந்தேன். ஸுப்ஹானல்லாஹ்! இருப்பதற்கும் இடமிருக்கவில்லை. நிற்பதற்கும் இடம் இருக்கவில்லை. அங்கு அமர்ந்திருந்த அறிமுகமில்லாத ஒருவர் எழுந்து பாவா இங்கு அமருங்கள் என்றார். அல்ஹம்து லில்லாஹ்! என்று அமர்ந்தேன்.
மறு நிமிடம் யூஸுப் என்ற ஒரு “சாப்” என்னிடம் வந்து “தர்ஹா” தலைவர் பாதுஷாவின் காலடியில் நின்று கொண்டு உங்களை அழைக்கிறார் என்றார். என் மனதை “கரண்ட்” அடித்தாற்போல் இருந்தது. அவ் இடம் நோக்கி வேகமாக நடந்தேன். பாதுஷா நாயகமவர்களின் கால்மாட்டு பக்கம் தலைவர் நின்றிருந்தார்.
இருவரும் “முஸாபஹா” செய்தபின் தலைவர் அவர்கள் ஒரு பொன்னாடையை பாதுஷா நாயகம் அவர்களின் “கப்ர் ஷரீப்” மீது வைத்து அதைக் கொண்டு என்னைப் போர்த்த அங்கு நின்ற மக்கள் “அல்லாஹு அக்பர்” என்று முழங்கினார்கள்.
தலைவர் அவர்கள் என்னைப் பிடித்துக் கொண்டு “இலங்கையில் வஹ்ஹாபிஸத்தை அழித் தொழிக்க நீங்கள் கடும் முயற்சி எடுக்கிறீர்கள். நீங்கள் மட்டுமே இப்போது இருக்கிறீர்கள். நீங்கள் ஸுன்னத் வல் ஜமாஅத் கொள்கையை நிலை நாட்டுவதற்காக உங்களை பாதுஷா நாயகம் வரவேற்கிறார்கள்” என்றார்.
காரணக் கடலின் காலடியில் நிகழ்ந்த இந் நிகழ்வு சொர்க்க வாசலில் நடந்த நிகழ்வாக – சொர்க்கத்தில் நடந்த நிகழ்வாக நான் கருதுகிறேன். அல்லாஹ் தலைவருக்கும், எனக்கும் பாதுஷா நாயகத்தின் பேரருளைத் தருவானாக!
மௌலவீ அல்ஹாஜ் A அப்துர் றஊப் மிஸ்பாஹீ பஹ்ஜீ
10.01.2023
