திருக்குர்ஆன் வசனங்கள் கொண்டு, அல்லது ஹதீதின் வசனங்கள் கொண்டு, அல்லது வலீமாரின் வசனங்கள் கொண்டு நோய்களுக்கும், பேய், ஜின், ஷெய்தான் போன்றவற்றின் தீமையிலிருந்து பாதுகாப்புப் பெறுவதற்கும் ஊதிப் பார்த்தல் (ஓதிப் பார்த்தல்), தண்ணீர் ஓதுதல், பீங்கானில் எழுதுதல் போன்ற வைத்தியங்களுக்கு பொதுவாக طَلْسَمَاتْ என்ற சொல்லைப் பயன்படுத்துவார்கள்.

இதன் சரியான சொல் طِلْسَمْ என்பதாகும். இதன் பன்மைச் சொல் طَلَاسِمْ என்று வரும். اَلطِّلَّسْمْ என்றும் சிலர் சொல்வர். இதன் பன்மைச் சொல் طِلَّسْمَاتْ என்று வரும். இது யூனானீ மொழிச் சொல்லாகும்.

 

இச் சொல்லையே அறபு மொழி பேசுகின்ற காபிர்களான மந்திரவாதிகளும், சூனியக் காரர்களும் தமது வைத்திய வேலைகளுக்கு பயன்படுத்துவார்கள். இதனால் இச் சொல்லுக்கு பொதுவான வரைவிலக்கணம் பின்வருமாறு சொல்லப்படுகிறது.

 

خُطُوْطٌ أَوْ كِتَابَةٌ يَسْتَعْمِلُهَا السَّاحِرُ، يَزْعُمُ أَنَّهُ يَدْفَعُ كُلَّ مُؤْذٍ،

சில கோடுகள், அல்லது சில எழுத்துக்கள். அவற்றை சூனியம் செய்வோர் பயன்படுத்துவர். அவை மனிதனுக்கு வேதனை செய்யக் கூடியவற்றைத் தடுக்கும் என்று அவர்கள் கருதுவர்.

 

பொதுவாக திருக்குர்ஆன் வசனங்கள் கொண்டும், ஹதீதின் வசனங்கள் கொண்டும், வலீமாரின் வசனங்கள் கொண்டும் வைத்தியம் செய்வது ஆகும். இதில் ஷரீஆவுக்கு எந்த முரண்பாடும் இல்லை. மேற்கண்ட வசனங்கள் கொண்டு ஊதிப் பார்ப்பதும் ஆகும். நீரில் ஊதி அதை குடிப்பதும் ஆகும். பீங்கானில் எழுதி அதை நீரால் அழித்து அதைக் குடிப்பதும் ஆகும்.

 

மேற்கண்ட வசனங்கள் கொண்டு வைத்தியம் செய்பவர்கள் அறபு மொழி எழுதவும், ஓதவும் – வாசிக்கவும் தெரிந்தவர்களாயிருப்பது அவசியம். இன்றேல் அவர்கள் தவறாக எழுதவும், வாசிக்கவும் சாத்தியமுண்டு. தவறாக எழுதியோ, ஓதியோ வைத்தியம் செய்வார்களாயின் வைத்தியம் பயனளிக்காமல் போவதுடன் தவறாக ஓதியதற்கான, எழுதியதற்கான தண்டனையும் கிடைக்கும்.

மேலே குறிப்பிட்ட வசனங்களல்லாத தமிழ் மந்திரமோ, சிங்கள மந்திரமோ மொழிவதும், எழுதுவதும் கூடாது.

 

முஸ்லிம்களிற் சிலர் தமிழ், சிங்கள மந்திரங்கள் சொல்லியும், எழுதியும் வைத்தியம் செய்கிறார்கள். இது தவறு. ஒரு வேளை இது “ஷிர்க்” இணை வைத்தலையும் ஏற்படு;த்தி விடலாம்.

 

முஸ்லிம்கள் தமக்கு நோய் ஏற்பட்டால் ஆங்கில வைத்தியம், அல்லது யூனானீ, ஆயுர்வேத வைத்தியம் போன்ற நாட்டு வைத்தியம் செய்ய வேண்டும். அல்லது உடற் பயிற்சி மூலமாவது சுகம் பெற முயற்சிக்க வேண்டும். அல்லது தனது ஷெய்கு, மற்றும் இறை நேசர்களின் பொருட்டு கொண்டு அல்லாஹ்விடம் “துஆ” கேட்பதன் மூலம் ஆரோக்கியம் பெற முயற்சிக்க வேண்டும். அதற்கும் சுகம் கிடைக்காத போது ஆன்மிக வைத்தியம் எனப்படும் திருக்குர்ஆன், திரு நபீயின் பொன் மொழிகள், அவ்லியாஉகளின் “அவ்றாத்” ஓதல்கள் மூலம் சுகம் பெற நடவடிக்கை எடுக்க வேண்டும். “காபிர்”களிடம் மருந்து மாத்திரைகள் மூலம் வைத்தியம் செய்யலாமேயன்றி “தாயத்” கட்டுதல், ஊதிப் பார்த்தல், தண்ணீர் ஓதுதல் போன்றவை செய்தல் கூடாது. ஒரு வைத்தியத்திற்கும் சுகம் கிடைக்கவில்லையாயின் அல்லாஹ்வின் மீது “தவக்குல்” வைத்து பொறுமை செய்வது தவிர வேறு வழியில்லை.

எனது ஆன்மிக குருமாரில் “தல்ஸமாத்” (தலாஸிம்) கலையோடு தொடர்புள்ள கௌரவத்திற்குரிய அஸ்ஸெய்யித், அஷ்ஷெய்கு, ஆஷிகுல் அவ்லியாயி அப்துர் றஷீத் கோயாத் தங்கள் மௌலானா வாப்பா றஹிமஹுல்லாஹ் அவர்கள் எனக்குச் சொல்லித் தந்த வைத்திய முறைகளில் சிலதை வைத்தியம் செய்யும் மௌலவீமாரின் இவ் உலக நன்மை கருதியும், நோயாளர்களின் நலன் கருதியும் இங்கு எழுதுகிறேன்.

ஒருவனுக்கு தலைவலி, தலையிடி, தலை சுற்று போன்றவை ஏற்பட்டால் முதற் சிகிச்சையாக – அவசர சிகிச்சையாக சில கை மருந்துகள் செய்து பார்க்க வேண்டும். பெணடோல் பாவித்துப் பார்க்கலாம். சுகம் கிடைக்காத போது MBBS டொக்டர் ஒருவரிடம் வைத்தியம் செய்யலாம். அதற்கும் சுகம் கிடைக்காத விடத்து ENT Surgeon ஒருவரிடம் வைத்தியம் செய்ய வேண்டும். அதற்கும் சுகம் கிடைக்காத போது “ஷரீஆ”வின் முறைப்படி வைத்தியம் செய்யும் ஓர் ஆலிம் – மார்க்க அறிஞரை அணுகி வைத்தியம் செய்யலாம். ஒன்றுக்குமே நோய் அசையவில்லையானால் நோயாளி தனது தலைவிதி இதுதான் என்று முடிவு செய்து அல்லாஹ்விடம் தனது நோய் சுகமாக “துஆ” செய்து கொண்டே இருக்க வேண்டும்.

 

தலைவலிக்கு “ஷரீஆ” அடிப்படையில் வைத்தியம் செய்யும் ஆலிம் அவர்களின் கவனத்திற்கு,

நீங்கள் இந் நோய்க்காக வைத்தியம் செய்ய விரும்பினால் நோயாளியிடம் சுகம் கிடைத்தால் எவ்வளவு பணம் தருவீர்கள்? என்று கேட்டு இருவரும் நியாயமான ஒரு முடிவுக்கு முதலில் வர வேண்டும். பிறகு நாகூர் நாயகம் பாதுஷா ஆண்டகை அவர்கள் பெயரில் நோயாளியால் நிறைவேற்றக் கூடிய அளவிலான ஒரு நேர்ச்சை செய்ய வேண்டும். பின்னர் உங்கள் பணியை தொடங்க வேண்டும்.

மூன்று நாட்கள் அல்லது ஏழு நாட்கள் சூரியன் உச்சியில் இருக்கும் நேரம் சுமார் 12 மணியளவில் வெயில் இல்லாத இடத்தில் – நிழலில் அவரை அமரச் செய்து, நீங்களும் அவருக்கு எதிராக அமர்ந்து பின்வருமாறு 9 அறைகள் வரும் வகையில் மணலில் ஓர் ஆணியால் கீற வேண்டும். உதாரணமாக

(கீழே படம் ஒன்றில் காட்டப்பட்டுள்ளவாறு)

என்பது போன்று. ஒவ்வோர் அறையிலும் மேற்கண்டவாறு எழுத வேண்டும். இவ் அட்சரம் எதிரும், புதிருமாக இருக்கும் உங்கள் இருவருக்கும் நடுவில் அமைந்திருக்க வேண்டும்.

 

எழுதியபின் 03 அங்குல நீளமுள்ள ஆணியின் கூர் கொண்டு முதல் எழுத்தான “அலிப்” எழுத்தில் குத்திக் கொண்டு “பாதிஹா சூறா”வை ஒரு தரம் ஓதி நோயாளியின் முகத்தில் ஊத வேண்டும். இதன் பின் இரண்டாம் எழுத்தான “பே” என்ற எழுத்தில் ஆணியைக் குத்திக் கொண்டு இரண்டு தரம் “பாதிஹா சூறா”வை ஓதி முகத்தில் ஊத வேண்டும். இவ்வாறு ஒவ்வோர் எழுத்திலும் ஆணியைக் குத்தும் போதும் ஒரு தரம் “பாதிஹா சூறா”வைக் கூட்டிக் கொள்ள வேண்டும். இறுதி எழுத்தான “லாம்” என்ற எழுத்தில் ஆணியைக் குத்திக் கொண்டு 12 தரம் “பாதிஹா சூறா” ஓத வேண்டும்.

இவ்வாறு ஓதி முடிந்த பின் ஓதியவர் தனது வலக் கரத்தின் பெரு விரல், சுட்டு விரல் இரண்டைக் கொண்டும் நோயாளியின் இரு கன்னங்களையும் நசுக்கிக் கொண்டு பின்வரும் திரு வசனத்தை 7 தரம் ஓதி முகத்தில் ஊத வேண்டும்.

இவ்வாறு மூன்று நாட்கள் அல்லது ஏழு நாட்கள் செய்தால் சுகம் கிடைக்கும். சுகம் கிடைத்த பின் நேர்ச்சையை நிறை வேற்ற வேண்டும்.

 

திரு வசனம்:

أَلَمْ تَرَ إِلَى رَبِّكَ كَيْفَ مَدَّ الظِّلَّ وَلَوْ شَاءَ لَجَعَلَهُ سَاكِنًا ثُمَّ جَعَلْنَا الشَّمْسَ عَلَيْهِ دَلِيلًا

அட்சரத்தில் 12 அறைகளை 09 அறைகளாகவும் அமைத்து சொன்னபடி செய்யலாம்.

(கீழே படம் இரண்டில் காட்டப்பட்டுள்ளவாறு)

இந்த அட்சரத்தில் இறுதி எழுத்தான ط – “தே” என்ற எழுத்தில் ஆணியை குற்றிக் கொண்டு 09 தரம் “பாதிஹா சூறா” ஓத வேண்டும்.

இவ்வாறு செய்தாலும் இறுதியில் மேற்கண்ட திரு வசனத்தை 03 தரம் ஓதி ஊதவே வேண்டும்.

 

மேற்கண்டவாறு செய்யும் கால கட்டத்தில் மருதோன்றிப் பூவில் ஒரு கைப்பிடியளவு எடுத்து “சம்சம்” நீர் ஊற்றி அதை அரைத்து மெல்லிய துணியில் அதைப் பூசி இரவில் துயிலும் போது நெற்றியில் ஒட்டிக் கொண்டு துயில வேண்டும்.

இது தீராத தலைவலி, தலை சுற்று, தலையிடி போன்றவற்றுக்கான மருந்தாகும்.

 சிறு பிள்ளைகள், அல்லது பெரியவர்கள் உறக்கத்தில் சலம் கழிக்கின்றார்களா?

ஆயுர்வேத அற்புத மருந்து!

 

எலுமிச்சை சாறில் ஊறிய, காய வைத்து எடுத்த நச்சீரகம் 100 கிராம், மாதுளம்பூ 100 கிராம், தாமரைப் பூ 100 கிராம் இவற்றை கல்லுரலில் போட்டு இடித்து பக்குவமாக வைத்துக் கொண்டு காலை, மாலை ஒரு தேக்கரண்டி தூளுடன் போதுமான சீனியும் கலந்து தொடர்ந்து சாப்பிடக் கொடுத்தால் இரவு நேர சிறு நீர்த் தொல்லை பறந்து விடும். இது சிறு பிள்ளைகளுக்கு மிகவும் பயன் தரும் மருந்தாகும். 40 வயதைக் கடந்தவர்களிற் சிலர் கூட உறக்கத்தில் சலம் கழிக்கிறார்கள். இதனால் இவர்களின் தொல்லை தாங்க முடியாமல் மனைவியர்களால் திருமணம் “பஸ்கு” செய்யப்பட்டு திருமணமே வேண்டாமென்று இருப்பவர்களும் சிலர் உள்ளனர். இவர்கள் குறித்த மருந்தை பாவித்தார்களாயின் எஞ்சியுள்ள வாழ்நாளில் திருமணம் செய்து நிம்மதியாக வாழ்வார்கள்.

 

மேற்கண்ட மருந்துகள் யாவும் கண்ணியத்திற்குரிய, என்னை “ஸெய்யிதுல் உலமா” سَيِّدُ الْعُلَمَاءِ என்று தங்களின் கையால் எழுதிக் கடிதம் அனுப்பிய மௌலானா வாப்பா அவர்கள் சொல்லித் தந்த மருந்துகளேயாகும். அவர்கள் தங்களின் கையால் எழுதிய மேற்கண்ட வசனம் தற்போது உயிருடனுள்ள எனது நண்பர் மௌலவீ ALM இஸ்மாயீல் பலாஹீ (அப்துஸ் ஸமத்) அவர்களிடம் இப்போதும் உள்ளது. தேவையானோர் அவரைச் சந்தித்துப் பெற்றுக் கொள்ளலாம்.

 

குத்புஸ்ஸமான் ஒருவரால் “ஸெய்யிதுல் உலமா” என்று வாழ்த்தப்பட்ட என்னையே “முர்தத்” என்று இலங்கை அறிவிலிகள் சபை கூறியிருப்பது விந்தையாக உள்ளது.

 

மேலும் மகான் அப்துர் றஷீத் கோயாத் தங்கள் றஹிமஹுல்லாஹ் அவர்கள் எனக்குக் கற்றுத் தந்த இன்னும் சில வைத்தியங்களை வாய்ப்புக் கிடைக்கும் போது எழுதுவேன். இன்ஷா அல்லாஹ்!