قال الشّيخ أبو مدين المَغربي، وهو من شُيوخ الشّيخ ابن عربي، رضي الله عنهما،

وَلَا تَلُمِ السَّكْرَانَ فِى حَالِ سُكْرِهِ – وَقَدْ رُفِعَ التَّكْلِيْفُ فِى سُكْرِنَا عَنَّا،

(الوجود الحقّ للنّابلسي،ص 257، عقيدة الصوفيّة، ص 2415)

 

அஷ்ஷெய்கு, அல்குத்பு அபூ மத்யன் அல் மக்ரிபீ றஹிமஹுல்லாஹ் அவர்கள் பின்வருமாறு கூறியுள்ளார்கள்.

(போதையில் உள்ளவனை அவனின் போதை நிலையில் இழிவு படுத்தி விடாதே!

நாங்கள் போதையிலுள்ள நேரம் எங்களை விட்டும் “தக்லீப்” ஏவல், விலக்கல் என்பன உயர்த்தப்பட்டு விட்டன)

ஆதாரம்: அல்வுஜூதுல் ஹக்கு, ஆசிரியர்: இமாம் நாபலஸீ,

அகீததுஸ் ஸூபிய்யா, பக்கம்: 415

 

அஷ்ஷெய்கு அபூ மத்யன் அவர்கள் உலகப் பிரசித்தி பெற்ற இறைஞான மா மேதை ஷெய்குல் அக்பர் இப்னு அறபீ அவர்களின் ஞான குருமாரில் ஒருவராவார்கள்.

 

போதை இருவகை:

ஒன்று – இறை போதை. மற்றது மது போதை. இறை போதை புகழப்பட்டது. மது போதை இகழப்பட்டது. தண்டனைக்குரியது. மது போதை “ஷரீஆ”விலும், தரீகாவிலும் விலக்கப்பட்டதேயாகும்.

 

قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «كُلُّ مُسْكِرٍ، حَرَامٌ، وَمَا أَسْكَرَ كَثِيرُهُ، فَقَلِيلُهُ حَرَامٌ»

“ஸுக்ர்” போதையை ஏற்படுத்தக் கூடிய அனைத்தும் “ஹறாம்” விலக்கப்பட்டதாகும். எது அதிகமாகப் பாவிப்பதால் போதை ஏற்படுகிறதோ அதில் சிறிதளவு பாவிப்பதும் “ஹறாம்” விலக்கப்பட்டதாகும் என்று நபீ அலைஹிஸ்ஸலாது வஸ்ஸலாம் அவர்கள் அருளினார்கள்.

 

மேற்கண்ட நபீ மொழியில் كُلُّ مُسْكِرٍ حَرَامٌ போதையை ஏற்படுத்துகின்ற எல்லாமே “ஹறாம்” விலக்கபட்டதென்று நபீ அலைஹிஸ்ஸலாது வஸ்ஸலாம் அவர்கள் கூறியுள்ளார்கள்.

இதன் மூலம் போதை வஸ்து என்று சொல்லப்படுகின்ற அனைத்தும் விலக்கப்பட்டதாகிவிடும். அந்த போதை வஸ்து எந்தப் பெயர் கொண்டு அழைக்கப்பட்டதாயினும் சரியே!

உதாரணமாக கள், சாராயம், பிரேண்டி, விஸ்கி, வைன், இன்னும் புதிய பெயர்களில் வந்துள்ள போதைப் பொருள்கள் போன்று. இன்னும் இதேபோல் போதைப் பொருட்கள் கலந்து தயாரிக்கப்பட்ட குடிபானம், உணவுப் பொருட்கள் போன்று. போதைப் பொருளின் பெயர்கள் எதுவாயினும் அவை கவனிக்கப்படமாட்டாது. அவற்றின் தன்மை மட்டுமே கவனிக்கப்படும்.

 

உதாரணமாக கஞ்சா, அபின் கலந்த நீர், மதுபானம் கலந்த நீர், மற்றும் ஏனைய எந்த உணவு வகைகள், இனிப்புப் பண்டங்கள், உறைப்பு பண்டங்கள் போன்றும், போதை தரக் கூடிய புகைத்தல் வகைகள் போன்றும்.

இவற்றை விட பயங்கர விலக்கப்பட்ட, “ஹறாம்” ஆனவைதான் ஐஸ், ஹெரோயின், மற்றும் புதிது புதிதாக வந்து கொண்டிருக்கும் ஏனைய போதைப் பொருட்களுமாகும்.

ஐஸ், ஹெரோயின், அபின், கஞ்சா, மற்றும் விஸ்கி, வைன் போன்ற போதை வஸ்துக்களின் பெயர்கள் குறித்து திருக்குர்ஆனிலோ, நபீ மொழிகளிலோ விலக்கல் வந்துள்ளதா என்று கேட்கும் போதைப் பிரியர்களும் உள்ளனர்.

இவர்களுக்கு நாம் பதில் கூறுவதாயின் பின்வருமாறு கூறலாம்.

 

மேற்கண்டவற்றின் பெயர்கள் குறித்து வராது போனாலும் இரு பெயர்களில் இவை எல்லாமே அடங்கிவிடுகின்றன. அவ் இரு பெயர்களில் ஒன்று سَكَرْ “ஸகர்” என்ற சொல், மற்றது خَمْرْ “கம்ர்” என்ற சொல். இவ் இரு சொற்களும் போதை வஸ்துக்கள் என்ன பெயர்களில் இருந்தாலும் அவை அனைத்தையும் உள்வாங்கிக் கொள்ளும் சொற்களாகும்.

 

உலமாஉகளுக்கும், அறபு மொழி கற்பவர்களுக்குமான ஓர் விளக்கம்:

سَكْرْ

– “ஸக்ர்” என்ற சொல்லும், سَكَرْ “ஸகர்” என்ற சொல்லும், سُكْرْ “ஸுக்ர்” என்ற சொல்லும், سُكُرْ – “ஸுகுர்” என்ற சொல்லும் سَكِرَ يَسْكَرُ என்ற சொல்லடியில் உள்ளதாகும். இதன் பொருள் குடிபானத்தால் மயக்கமுற்றான் என்று வரும்.

இதேபோல் سَكْرْ “ஸக்ர்” என்ற சொல் سَكَرَ يَسْكُرُ என்ற சொல்லடியில் உள்ளதாயின் இதற்கு வேறு பொருள் – அதாவது பாத்திரத்தை நிரப்பினான் என்ற பொருள் வரும்.

இன்னுமிதேபோல் سَكَرْ “ஸகர்” என்ற சொல் سَكِرَ يَسْكَرُ என்ற சொல்லடியில் உள்ளதாயின் இதற்கு குளம், அல்லது நீர்த் தாங்கி நிரம்பியது என்று பொருள் வரும்.

இன்னுமிதேபோல் سَكَرَ يَسْكُرُ سُكُوْرًا என்று வந்தால் இதற்கு காற்று நின்றது என்றும், சூடு குறைந்தது என்றும் பொருள் வரும்.

 

இன்னுமிதேபோல் سَكَرَ يَسْكُرُ سَكْرًا என்று வந்தால் ஆற்றுக்கு தடை போட்டான், கதவை பூட்டினான் என்று பொருள் வரும்.

முதலில் சொல்லப்பட்ட நான்கு சொற்களும் (سُكْرْ، سَكَرْ، سَكْرْ، سُكُرْ) سَكِرَ يَسْكَرُ என்ற சொல்லடியில் உள்ளதாகும். இவ் அடியில் வந்த சொற்களுக்கு மட்டுமே “போதை” என்ற பொருள் வரும்.

போதை உள்ளவன் என்பதற்கு سَكْرَانْ என்றும், போதை உள்ளவர்கள் என்பதற்கு سُكَارَى என்றும், போதை உள்ளவள் என்பதற்கு سَكْرَى என்றும் சொல்லப்படும்.

எமது தலைப்புக்குத் தேவையான சொல் இறுதியாகச் சொல்லப்பட்ட சொல்லேயாகும்.

இச் சொல், போதை தரக் கூடிய அனைத்து வஸ்துக்களையும் உள்வாங்கிக் கொள்ளுமாகையால் போதை வஸ்துக்களின் பெயர்கள் குறித்து திருக்குர்ஆனிலோ, ஹதீதிலோ சொல்லப்பட்டிருக்க வேண்டுமென்ற அவசியமில்லை.

 

இவ்வாறுதான் خَمْرْ “கம்ர்” என்ற சொல்லுமாகும். இச் சொல்லுக்கு அதிகமானோர் “கள்” என்று பொருள் சொல்கிறார்கள். எனது பார்வையில் “கள்” என்று மட்டும் பொருள் கொள்ளாமல் “அக்ல்” புத்தியை மறைக்கும் அனைத்து வஸ்துக்களுக்கும் இச் சொல் பொருத்தமானது என்பதேயாகும்.

 

ஏனெனில் خَمْرْ “கம்ர்” என்ற சொல்லுக்கு “மறைத்தல்” என்ற பொருள் உண்டு. خَمَرَهُ என்றால் அதை மறைத்தான் என்று பொருள் வரும். இதன்படி كُلُّ مُسْكِرٍ مُخَامِرِ الْعَقْلِ எதெல்லாம் “அக்ல்” புத்தியை மறைக்கிறதோ அதெல்லாம் “கம்ர்” என்று சொல்ல முடியும். எனவே, புத்தியை மறைக்கும் அனைத்தும் “கம்ர்” என்று சொல்வதற்கு பொருத்தமானதேயாகும். இவ் அடிப்படையில் எந்தப் பெயரில் போதை தரக் கூடியவை இருந்தாலும் அவை “கம்ர்” என்பதில் அடங்கிவிடும்.

 

திருக்குர்ஆனில் பின்வருமாறு வந்துள்ளது.

 

يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ

விசுவாசிகளே! நிச்சயமாக மதுவும், சூதாட்டமும், வணக்கத்திற்காக நடப்பட்டுள்ளவைகளான சிலைகளும், குறி பார்க்கும் சூதாட்ட அம்புகளும் ஷெய்தானுடைய செயலிலுள்ள அருவருக்கத்தக்கவையாகும். ஆகவே, இவைகளைத் தவிர்த்துக் கொள்ளுங்கள். நீங்கள் வெற்றி பெறுவீர்கள். (திருக்குர்ஆன் 05-90)

இத்திரு வசனத்தில் “கம்ர்” என்ற சொல் பயன்படுத்தப்பட்டுள்ளது இங்கு கவனத்திற் கொள்ள வேண்டியதாகும்.

 

“கம்ர்” என்றாலும், “முஸ்கிர்” என்றாலும் போதையை ஏற்படுத்தக் கூடிய அனைத்தையும் எடுத்துக் கொள்ளக் கூடிய சொற்களாகும்.

அதாவது وَمَا أَسْكَرَ كَثِيرُهُ، فَقَلِيلُهُ حَرَامٌ எதை அதிகமாக பாவித்தால் போதை ஏற்படுமோ அதில் சிறிதளவு பாவித்தாலும் “ஹறாம்” தான்.

உதாரணமாக கஞ்சா, அபின், ஹெரோயின், ஐஸ் போன்று. இவற்றில் அதிகம் பாவித்தாலும், சிறிதளவு பாவித்தாலும் பாவம் பாவம்தான்.

 

இதற்கு ஓர் உதாரணம் சொல்லலாம். ஒருவரையொருவர் உயிரினும் மேலாக நேசிக்கும் ஐந்து பேர் ஐந்து நட்சத்திர ஹோட்டலுக்குப் போய் தங்கினார்கள். அனைவரும் இளைஞர்களாவர். அவர்களில் ஒருவர் தவிர மற்ற நால்வரும் இடையிடையே குடிப் பழக்கம் உள்ளவர்களாவர். ஐந்து நட்சத்திர ஹோட்டல் என்பது குடிப்பழக்கம் இல்லாதவனையும் குடிக்கத் தூண்டும் ஓர் இடமாகும். அங்கு செல்பவர்களில் இறை பக்தி உள்ளவர்கள் மட்டுமே தப்பித்துக் கொள்வார்கள்.

 

ஐவரில் நால்வர் குடித்தார்கள். ஒருவர் மட்டும் குடிக்காமல் அவர்களுடன் இருந்தார். நால்வரும் சேர்ந்து அவனிடம் நீ குடிக்காது போனாலும் எங்களைத் திருப்திப் படுத்துவதற்காக விரலால் தொட்டு நாக்கில் வைத்தால் போதும் என்றார்கள். அவனோ ஒன்றுமே செய்ய முடியாத சூழுலில் அவர்கள் சொன்னது போல் செய்தான். இவனும் குடித்தவர்களில் ஒருவன்தான். இவன் பிறரைத் திருப்திப் படுத்துவதற்காக சலம் ஒரு சொட்டையாவது நாக்கில் வைக்க முடியுமா?

 

ஆழமான அறிவில்லாத பொது மக்களிடம் ஓர் அபிப்பிராயம் நெடுங்காலம் தொட்டு இருந்து வருகிறது. அதாவது மஸ்தான்கள் என்போரும், ஸூபீகள் என்போரும், ஞானிகள் என்போரும் கஞ்சா, அபின் பாவிப்பவர்கள் என்று. அவர்களின் இவ் அபிப்பிராயம் பிழையானதாகும். மஸ்தான்களிலும் கூட ஒரு சிலர் பாவித்திருக்கலாம். ஆயினும் ஸூபீ மகான்களில் எவரும் பாவித்ததாக நான் அறியவில்லை.

 

குணங்குடி மஸ்தான் ஸுல்தான் அப்துல் காதிர் புலவர் றஹிமஹுல்லாஹ் அவர்கள் “மஸ்தான்” என்று மக்களால் அழைக்கப்பட்டதால் அவர்களும் கஞ்சாக் குடித்தார்கள் என்று சிலர் நினைக்கிறார்கள். அது தவறு. அதற்கான ஆதாரம் அவர்கள் தங்களின் பாடல் ஒன்றில்,

“கஞ்சா அபின் வர்க்கம் கசப்பாயிருக்கவும்

காசாசை மனதைக் கலக்காதிருக்கவும்”

என்று பாடியிருப்பதேயாகும்.

 

நான் மேலே எழுதிய விடயங்களை வாசித்தவர்களுக்கு பின்வருமாறு ஒரு கேள்வி எழலாம்.

وَمَا أَسْكَرَ كَثِيرُهُ، فَقَلِيلُهُ حَرَامٌ

“எதை அதிகம் சாப்பிட்டால் (குடித்தால்) போதை ஏற்படுமோ அதில் சிறிதளவு சாப்பிடுவதும் (குடிப்பதும்) பாவமேயாகும்” என்ற ஹதீதின் படி பேரீத்தம் பழம் அதிகம் சாப்பிட்டால், தேன் அதிகம் குடித்தால் ஒரு வகை மயக்கம் ஏற்படலாம். இந்த நபீ மொழியின் படி பேரீத்தம்பழம் ஓரளவு சாப்பிடுவதும், தேன் ஓரளவு குடிப்பதும் “ஹறாம்” ஆகுமா? குற்றமாகுமா? என்ற கேள்வி ஏற்பட இடமுண்டு.

இதற்கு “பிக்ஹ்” சட்டக் கலையில் என்னை விட அதிக அறிவும், அனுபவமும் உள்ளவர்களே சரியான பதில் கூற வேண்டும்.

 

இன்று ஐஸ், ஹெரோயின், மற்றும் “டெப்லட்” போதை மாத்திரைகள் போன்றவையின் பாவனை பரவலாகியுள்ளது. இவற்றைச் சாப்பிடுவதும், குடிப்பதும் நஞ்சைக் குடிப்பதற்கு சமமானதென்று அனைவரும் அறிந்து கொள்ள வேண்டும். குறிப்பாக இளைஞர்களும், அதிலும் குறிப்பாக படிக்கின்ற மாணவர்களும், மாணவிகளும் அறிந்து கொள்ள வேண்டும்.

 

இறை மதுவை அருந்தி

இறை போதை வெள்ளத்தில் மிதப்போம்!

முற்றும்.